حاجة مهمه جداً عمرنا ما خدنا بالنا منها " على شخصيات ديزني"

شخصيات ديزني, اتربينا عليها وكبرنا معاها, حبيناها بشدة لدرجة الهوس في بعض الاحيان

هل من الممكن وبعد كل المرات الي تابعنا فيها افلامنا المفضلة وعدناها مره واتنين ... وعشرة, تكون في تفصيلة مهمة المفروض تكون عند كل البني ادميين وفلتت مننا ومن صناع الفيلم مان؟

كونتو فكرة عن اللي انا بتكلم عنه؟

بالظبط كده, الضوافر اللي المفروض تكون على صوابعهم..همّ فين؟

لم تفكر في الموضوع هتقول لنفسك ان التفصيلة دي وقعت منهم واكيد انت خدت بالك بس كنت ناسي.

مش من الغريب ان كاركترات المفروض بتمثل شخصيات انسانية ومايكونش عندهم ضوافر؟ يمكن اه ويمكن لاء..

سندريللا مثلا مش عندها ضوافر في صوابعها, هي محتاجالهم اصلاً... شكلها كده جميل.

وتيانا كمان ...

يمكن كانو متعمدين ان كل الشخصيات النسائية الحلوة تكون من غير ضوافر؟

او .. لاء...

طب ايه بالنسبة للشخصيات الرجالية؟.. الراجل دا اللي كان مع مولان, عنده ضوافر اهو..

والاب الملك من فيلم ميراميد, عنده بردو ضوافر..

طب يعني هم مديين الرجاله بس؟

لاء ماهو علاء الدين من الشخصيات الرجالية وبردو مش عنده !

يمكن عشان شكل الضوافر مش اد كده ادوها بس للشخصيات  الجلفه  .. ؟!

طب ماليفيسنت عندها ضوافر حلوة جداً وحاطة مانيكير احمر كمان.

والست الرخمة دي اللي ماكانش حد فينا طايقها بردو ضوافرها حلوة جداً

والملكة الشريرة كانت ضوافرها متظبطة على الآخر.

استنو استنو , مش دا فرنش مانيكير !!

كدا ممكن نوصل لنتيجة, ان الضوافر للاشرار, والحلوين لاء.

لاء استنو, الشخصية دي "من اليس في بلاد العجائب" ماعندهاش ومش حلوة ولا أمورة زي اللي فاتو وماكانش عندهم

وبعدين في شخصيات تانية هنا اهي عندها ضوافر زي دا مثلا ..

واهو ظاهر في مشهد تاني اهو ... وماعندوش!!

الاميرة ياسمين هنا في الحتة دي من اجمل الحتت في الفيلم .. وعندها ضوافر

ماعدا بعض المناظر في الفيلم ... ماعندهاش

وهنا بيتبادر لذهني سؤال ملح جداً جداً, مين اللي بيقرر أو بيحدد؟؟

مين اللي بياخد القرار المتعلق بالضوافر؟

عشان زي ماكلنا عارفين ان الضوافر عند البشر مهمه وبتكمل الشخصية.

بالرغم من انك لو كنت جنية شيء ما؛ يمكن ماتكونش محتاج لضوافر , ممكن نعتبر دا كلام منطقي.

انما انك تكون جني عملاق وازرق واقرع وجسمك نصه دخان, وعندك ضوافر؟!! انا كده تهت منكم بصراحة.

يمكن احنا عمرنا ماحنعرف السبب الحقيقي

ومضطرين نعيش او نتعايش مع السر الدفين دا... شكراً ديزني :)

منتظرين اراءكم ومقترحاتكم؛