شوفت قبل كدة الدهب أصله ايه او جه منين؟

ما هو أصل الدهب أو من أين جاء؟

الدهب يعتبر من أكتر الحاجات القيمّة هنا على كوكب الأرض ورمز للغنى والملكية والفحش وكل حاجة، بس على أد ما بنتفاخر بيه، الدهب (وكل العناصر التقيلة) مصدره مش من كوكبنا بل مستلفينه من مكان آخر، النجوم. النجوم مصنوعة من أبسط وأصغر العناصر، الهيدروجين، بسبب إن النجمة كتلتها كبيرة جدًا فجاذبيتها بتضغط على الهيدروجين وتخليه ذراته تندمج مع بعضها (يسمى الإندماج النووي) والعملية دي بتتسبب في خروج طاقة هائلة بتخلي النجمة عندها طاقة ومشعة ومضيئة طول ما فيه مخزون من وقود الهيدروجين، وبيفضل الصراع دا في حياة النجمة، الجاذبية تضغط الإطار الخارجي للنجمة للداخل، ولكن الإندمج النووي في قلب النجمة يدفع للخارج ويفضل التوازن دا طول ما فيه مخزون هيدروجين في قلب النجمة.

ذرات الهيدروجين لما بيندمج مع بعضها بيكون عناصر أتقل منه زي الهيليوم والكربون والأكسجين، وبعد كدا العناصر بتندمج وتكون عناصر أتقل وأتقل لغاية ما يوصلوا للحديد، وعند وصول النجم للمرحلة دي مبيقدرش يعمل إندماج تاني والجاذبية بتسيطر تمامًا وتضغط على النجم على نفسه من الخارج لحد ما ينفجر، إنفجار بيسمى السوبر نوفا، وبسبب إن الإنفجار دا بيبقى ضغطه وطاقته فوق الخيال بيخلي جسيمات صغيرة أسمها الإلكترونات (سالبة الشحنة) تندمج مع جسيمات تانية تسمى البروتونات (موجبة الشحنة) لتكوين جسيمات من نوع ثالث محايدة الشحنة (النيوترونات) والنجم الأصلي بعد إنفجاره يخلف وراءه نواته المكونة حاليًا من شوربة سميكة جدًا من النيوترونات تسمى النجم النيوتروني، بسبب إن النيوترون متعادل أو محايد الشحنة ومش بيتنافر مع العناصر الأخرى، دا بيسمح لذرات الحديد إبتلاعهم بسهولة وفي المرحلة دي الحديد يقدر يتحول للعناصر الأتقل منه زي الفضة والدهب والرصاص واليورانيوم، إلخ.

الدهب والعناصر دي كلها بعد كدا بتنتشر في الفضاء بفعل موجات إنفجار السوبرنوفا، ونفس الإنفجار دا بيتسبب في إن الغبار الكوني حوله يتكثف ويصنع نجوم وكواكب جديدة (الأرض والمجموعة الشمسية غالبًا ناتجين عن إنفجار ناتج عن موت نجمة عتيقة قبلنا بكتير) والدهب بينتشر ويدخل في قلوب تلك الكواكب الجديدة (زي الأرض وغيرها) وبعد كدا يتشكل على شكل عروق بسبب النشاط الحراري للأرض ومن هنا إحنا بنجمعه.

الدهب من العناصر النادرة لدرجة إن كل الدهب إللي جمعناه في التاريخ يمكن وضعه في 3 حمامات سباحة أوليمبية الحجم (ولكن كتلتهم كبيرة لأن الدهب أكثر كثافة من الماء ب40 مرة) وممكن أيضــًا تحول المعادن الخسيسة أو القليلة زي الرصاص إلى دهب في المعامل (أو مصادمات الجسيمات particle accelerators) ولكن بتصنعها ذرة بذرة، وبسبب إن الذرة صغيرة جدًا جدًا جدًا جدًا جدًا، لو أنتجت  منها 2 مليون واحدة في الثانية، هتضطر تنتج بالمعدل دا 50 مليون سنة عشان تعمل جرام دهب واحد! .